ஓம் ஸ்ரீ சாயிராம்
101 hits
நட்பின் இலக்கணம் தலைப்பில், என் எழுத்துப்பயணத்திற்கு inspirationஆக இருந்த எழுத்தாளர் வத்சலா ராகவன் அவர்களின் நட்பு பற்றி எழுதியிருந்தேன்.
அதன் பின்குறிப்பில், என் கதையில் நான் கற்பனை செய்த ஹரி நிஜத்தில் இருப்பதைக் கண்டறிந்த அந்த நெகிழ்வான தருணத்தைப் பற்றி தனிப் பதிவில் எழுதுவதாகக் குறிப்பிட்டிருந்தேன்.
அந்தப் பதிவு, இதோ உங்கள் பார்வைக்கு…
மூன்று வருடங்களுக்கு முன் அடிக்கடி வந்து சுகவேதனை தந்த ஒரு கனவுதான் என் எழுத்துப்பயணத்தின் ஆரம்பம்.
அந்தக் கனவைப் பற்றி சுருக்கமா சொல்லணும்னா, எழுத்தாளரா ஆகணும்ன்ற தன் ஆசையைப் புறம் தள்ளி வச்சிட்டு, வேண்டா வெறுப்பா ஒரு bank உத்தியோகத்தில் பணியாற்றும் ஒருவர். நம்பிக்கை இழக்காதே எனத் தேற்றி ஆறுதல் கூறும் அவர் உற்றதோழி. இந்தமாதிரி ஒரு சீன் தான் என் கனவில் அடிக்கடி வந்து என்னைத் தூங்கவிடாமல் பாடாய்ப்படுத்தித்து.
எழுதினால் மனபாரம் குறையும்னு என் பாட்டி கற்றுக்கொடுத்த Magicஐ கொஞ்சம் வித்தியாசமா செயல்படுத்தினேன்.
என் கனவில் வந்த ரெண்டுபேருக்கும், எனக்குப் பிடிச்சா மாதிரி பெயர் வச்சு, கனவில் வந்த காட்சிகளோட கூடக் கொஞ்சம் கற்பனையும் கலந்து அதைக் கதையா எழுதினேன். ஹரி, தன் நண்பர்கள் தந்த தார்மீக ஆதரவுடன் சிறந்த எழுத்தாளர் ஆனா மாதிரி சுபமா முடிச்சிருந்தேன்.
கதையின் நகர்வு ரொம்ப நல்லா இருக்குன்னு அம்மா தந்த ஊக்கத்தில் நெடுநாவலா எழுதி ஆன்லைனிலும் பதிவிட்டேன்.
கதை எழுதறேன்ற பேருல, கிட்டதட்ட ஒரு வருஷம் இவங்கள சுத்தியே என் சிந்தனைகள் ஓட, கதை எழுதி முடிச்ச பிறகும் அவங்கள என்னால மறக்கவே முடியல.
ஹரி, மீரா, அரவிந்தன், அஞ்சலின்னு… இவங்க பெயரில் யாரைப் பார்த்தாலும், என்னையும் அறியாமல் ஒரு தனி ஈர்ப்பு வந்துடும்.
இப்படித்தான் சென்ற வருடம் எழுத்தாளர் திரு.ஹரிஹரசுதன் அவர்கள் முகநூல் பக்கத்தைக் கண்டதும், உடனே follow பண்ண ஆரம்பிச்சேன்.
ஜனவரியில் நடந்த புத்தகக் கண்காட்சியில், அவர் எழுதிய “AI எனும் ஏழாம் அறிவு” புத்தகம், one of the top selling booksன்னு திரும்பும் பக்கமெல்லாம் அவரைப் பற்றிய செய்திகள் தான். பார்க்கவே கண்கொள்ளா காட்சியாக இருந்துது. என் கதையில் வந்த ஹரியே ஜெயிச்சுட்டா மாதிரி ஒரு இனம் புரியா சந்தோஷம்.
அந்தச் சமயம் அவர், தன் எழுத்துப் பயணத்தைப் பற்றிய ஒரு போஸ்ட் போட்டிருந்தார்.
Believe me or not, நான் கதையில் கற்பனை செய்த பெரும்பாலான விஷயங்கள் அவர் வாழ்க்கையில் நிஜமாவே நடந்திருந்துது.
அவர்கிட்ட அதைப் பற்றி சொல்ல…நிகழ்வுகள் மட்டும் இல்லை… அவர் வாழ்க்கையில் உறுதுணையாக இருந்த நபர்களின் பெயர்களும் என் கதைமாந்தர்களின் பெயரும் கூட ஒரே மாதிரி இருக்குன்னு அவர் சொல்லிக் கேட்டபோது, எனக்கு மெய்சிலிர்த்துபோச்சு. I felt very blessed and grateful.
அதைப்பற்றி, திரு.ஹரிஹரசுதன் அவர்கள் தன் முகநூல் பக்கத்தில் பதிவிட்டிருந்த போஸ்ட் கீழ்வருமாறு… (அதன் screenshotம் இணைத்துள்ளேன்.)
As posted by Mr. Hariharasuthan…
இப்படியும் நடக்குமா !! — சார் ! நான் இரு வருடங்களுக்கு முன் கதையில் எழுதிய சம்பவங்கள் உங்களுக்கு அப்படியே நிகழ்கிறது என, ஒரு புதிய நண்பரிடமிருந்து ஒரு செய்தி,
அவரது கதையில் எழுத்தாளர் பெயர் ஹரி, தந்தையை இழந்தவன் இனி எழுத்தே வேண்டாம் என மன உளைச்சலில் திரிகிறான். அரவிந்தன் எனும் நண்பருக்கு ஹரி எழுத்தின் வலிமை தெரியும். எழுதச் சொல்கிறான். ஹரி தன் துயரத்தில் இருந்து மீள ஒரு தொடர் எழுதுகிறான். அது புத்தகமாக வெளிவந்து, புத்தகம் அமோகமாக விற்பனையாகி லட்சங்களில் ராயல்டி வாங்குகிறான். அது விற்பனையாக நண்பர்கள் தான் உதவுகிறார்கள், ஆச்சர்யம் இதோடு நிற்கவில்லை. அந்தப் புத்தகத்தை வெளிக் கொண்டு வந்த பதிப்பாளர் பெயர் என்ன தெரியுமா, ஶ்ரீராம். கதையை சற்று நிறுத்தி நிஐத்திற்கு வருவோம்
ஐந்து வருடங்களுக்கு முன்பு மின்னம்பலம் அரவிந்தன் அவர்கள் தான் எனக்குத் தொடர் எழுதும் முதல் வாய்ப்பு தந்தவர், தாவூத் தொடர் இன்றும் வாசிக்கப்பட்டு வருகிறது. இதற்கும் நேற்று தான் காலச்சுவடு அரங்கில் அரவிந்தன் அவர்களை முதல்முறையாக நேரில் சந்தித்தேன். அடுத்த ஆச்சர்யம், இப்போது ராம்ஜி அவர்கள் AI விற்பனை குறித்து பேசும் போதெல்லாம், இது எல்லாமே நண்பர்களால் தான் என தொடர்ந்து சொல்லியிருக்கிறேன். இதே உரையாடல் அட்சரமாய் அப்படியே கதையில் வந்திருக்கிறது . இப்போ இந்த கதைல எழுத்தாளர் ஹரி என்ன ஆனார் என்பதை விட, பதிப்பாளர் ஶ்ரீராம் எனும் ராம்ஜி என்ன ஆனார்னு கதாசிரியரிடம் கேட்டிருக்கிறேன். 
கதைக்கு நன்றி – Vidya Venkatesh
என் எழுத்துப்பயணத்திற்கு அழகூட்டிய இந்த எதிர்பாராத நட்பைப் பற்றி உங்களிடம் பகிர்ந்துகொள்வதில் எனக்கு மட்டற்ற மகிழ்ச்சி.
Please Comment Here