5 hits
ஓம் ஸ்ரீ சாய்ராம்
எந்தக் குழந்தையும் நல்ல குழந்தைதான் மண்ணில் பிறக்கையிலே,
அவர் ஹீரோ(ஹீரோயின்) ஆவதும், ஆன்ட்டி ஹீரோ(ஹீரோயின்) ஆவதும் அமையும் சந்தர்ப்பச் சூழ்நிலைகளிலே – அதை
சரியென்று ஏற்பதும், தவறென்று மறுப்பதும் பார்ப்பவர் கண்ணோட்டத்திலே!
ஒரு நாணயத்திற்கு இரண்டு பக்கங்கள் இருப்பதுபோல, ஒவ்வொரு மனிதனுக்கும் இருமுகங்கள் உண்டு. ஆசை, கோபம், பாசம், வெறுப்பு, இன்பம், துக்கம் என எல்லா உணர்ச்சிகளின் கலவை தான் மனிதன்.
எந்தவொரு சூழ்நிலையிலும் அதைக் கட்டுக்குள் வைத்து செயல்படுபவன் நல்லவன் ஆகிறான்; நம் கண்களுக்கு ஹீரோவாக தோன்றுகிறான். அவ்வுணர்ச்சிகளை அதீதமாய் வெளிப்படுத்தும் போது அவனே கெட்டவன் ஆகிறான்; நம் கண்களுக்கு ஆன்ட்டி ஹீரோவாக தோன்றுகிறான்; அவ்வளவு தான் வித்தியாசம்.
அன்றாடும் நாம் சந்திக்கும் ஒவ்வொருவருக்குள்ளும் இக்குணம் ஒளிந்திருக்கும். அதை அறவே ஒழித்தல் என்பது சாத்தியமில்லை; அளவாக வெளிப்படுத்த முயற்சிசெய்யலாம்; விட்டுக்கொடுத்து வாழ பழகிக்கலாம்.
அப்படிப்பட்ட மனிதர்களைத் தான், நான் இக்கதையின் வழியே உங்களுக்கு அறிமுகம் செய்ய விழைகிறேன். அவர்களின் அக்குணத்திற்குப் பின்னால் ஒளிந்திருக்கும் அன்பு, அக்கறை யாவும் கண்ணுக்குத் தெரியும்போது, மேகம் நீங்கிய நீலவானம் போல மனத்தில் தெளிவு பிறக்கிறது; தெளிந்த மனம் பாசம் கொள்கிறது; குற்றங்களைத் தள்ளிவைத்து நேசிக்கத் துவங்குகின்றது.
மொத்தத்தில், இது ஆரவாரம் இல்லாத மென்மையான குடும்பக் கதை. உறவுகளின் உரிமை போராட்டங்களைப் பற்றியது. மன இறுக்கம் பற்றிய சில செய்திகளையும் இக்கதையின் மூலம் பகிர்ந்துகொள்ள விரும்புகிறேன்.
கதையின் முக்கியமான மூன்று நபர்களை, உங்களுக்கு அறிமுகம் செய்கிறேன்.
குணா என்னும் குணசேகரன்:
பெற்றோர் மெச்சும் பிள்ளையாக, உறவுகள் கொண்டாடும் உத்தமனாக, ஊரார் போற்றும் மனிதனாக இருந்தவன், இன்று அனைவரின் வெறுப்பையும் சம்பாதித்தது ஏன்?
பெற்றோரின் விருப்பத்தை மீறி திருமணம் செய்து கொண்டது தான் பிழையா-இல்லை
உயிரானவளை ஏழ்கடல் தாண்டி அழைத்துச் சென்று தொலைத்தது தான் சரியா-இன்று
தாயில்லா பிள்ளைக்குப் பாசம் கேட்டு உறவுகள் முன் நிற்பது தான் குற்றமா?
கசப்பான பக்கங்களைத் திருத்தி அமைக்க எண்ணும் இவனை ஏற்காமல், உறவுகள் கற்கள் எறிந்து விரட்ட, அவற்றையே கொண்டு, தன்னைச் சுற்றி கோட்டை கட்டிக்கொள்கிறான் குணா. தனி ஆளாக, பெண் குழந்தையை வளர்க்கும் சவால்கள் ஒருபுறம் இருக்க, மனைவியை திட்டமிட்டுத் தொலைதூரம் அழைத்துச் சென்று தொலைத்ததின் மர்மத்திற்கு ஒரே சாட்சியாக விளங்கும் அந்தக் குழந்தையைத் தன்னுடனே வைத்துக்கொள்ள வேண்டிய கட்டாயமும் அவனுக்கு.
பவி என்னும் பல்லவி…
நினைத்ததைச் சாதித்தே தீர வேண்டுமென்ற அவள் பிடிவாத குணத்திற்கும் கண்மூடித்தனமாகத் தலையாட்டும் பாசப்பிணைப்புகளின் நடுவில் வளரும் முடிசூடா இளவரசி அவள்.
அன்னை முகம் இவள் கண்டதில்லை-ஆனால்
அண்ணன் அரவணைப்புக்குக் குறைவும் இல்லை.
அண்ணி என வந்தவள் அந்நியமாய் இருந்ததே இல்லை.
தகப்பன் பாசம் இவள் அறிந்ததில்லை – பாட்டியின்
தாலாட்டு பாடலுக்கு மிஞ்சிய அன்பும் இல்லை-வீட்டின்
செல்லப் பிள்ளையாக வளர்ந்த இவள் – இனிமேல்
சந்திக்கப் போகும் சவால்களுக்கும் எல்லையே இல்லை.
புத்தி சாதூரியத்தின் மொத்த உருவமாய் இருப்பவள் மனத்தில் காதல் முளைக்கிறது. ஆனால் அதைச் செடியாக்கி, மரமாக்கி அவள் வளர்க்க நினைக்கும் இடமோ பாறையான ஒரு இதயம்.
வீசிய கற்கள் கொண்டு கோட்டை கட்டிக்கொண்டவன் மனமும் சேர்ந்து பாறையானது.
அந்தப் பாறையில் கசிந்த தேனினும் இனிமையான ஒரு சொட்டு நீர்த்துளியைப் பருகியவளுக்கு, பாறைமனம் படைத்தவனைத் தனதாக்கி கொள்ள வேண்டுமென்ற பேராசை தலைக்கேறியது.
உறவுகளே வேண்டாம் என்று விலகிச் சென்றவனை, விரட்டி விரட்டித் துரத்துகிறாள் இவள். மனத்திற்குப் பிடித்தவனைக் கைப்பிடிக்கும் குறிக்கோள் ஒன்றே பிரதானம் என்று நினைக்கின்றவள், தான் செய்யும் செயல்களின் நல்லது கெட்டதைப் பற்றிச் சிறிதளவும் சிந்திப்பதே இல்லை. தனக்குத் தெரிந்த, தெரியாத அத்தனை மந்திரம் தந்திரங்களின் மூலம் அவனைத் தன் வசப்படுத்த பார்க்கிறாள்.
மது என்னும் மதுமிதா…
இப்பூவுலகில் ஜென்மம் எடுத்ததைத் தவிர வேறொன்றும் பிழை செய்யாத இரண்டு வயது பிஞ்சு குழந்தை அவள்; குழந்தைதானே என்று அலட்சியம் கொண்டு பெரியவர்கள் செய்த, பேசிய அனைத்துச் செயல்களுக்கும் ஒரே சாட்சி அவள்.
தன்னைச் சுற்றி நடந்தவற்றின் நியாய அநியாயங்களை உணர்ந்து மௌனம் காத்தாளா!
நீதிதேவதைக்கு யாரும் நிகரில்லை என்று உண்மையை உரக்கச் சொன்னாளா!
தாய் பாசமே அறியாதவள், தந்தை பாசத்தில் கரைந்தாளா- தானே
தாரம் எனத் தர்க்கம் செய்து, தந்தை கைகோர்க்க நினைத்தவளின்,
தாரக மந்திரங்களில் தடுமாறிப் போனாளா?
தன்னை நேசித்தவர்களுக்கும், தூற்றியவர்களுக்கும், பாரம் எனத் தள்ளி வைத்தவர்களுக்கும், பாவம் எனத் தள்ளி நின்றவர்களுக்கும் இவள் என்ன பதில் சொல்லப் போகிறாள்…
‘பாசமென்னும் பள்ளத்தாக்கில்’ விழுந்தார்களா, தள்ளினார்களா, இல்லை தள்ளப்பட்டார்களா என்பதை இவர்களுடனும் இன்னும் சில விந்தை மனிதர்களுடனும் பயணித்துத் தெரிந்துகொள்ளலாம் தோழமைகளே.
Please Comment Here